احتفلي **طريقة عمل جاتوة الباباز بالصور**

بس يا سلام لو يخترعولنا حاجة تصور الريحة والطعم

المكونات

3 معالق زبدة وممكن سمنة بدرجة حرارة المطبخ
نصف كوب سكر
نصف كوب لبن دافئ
2 كوب دقيق منخول مع رشة ملح
4 بيض احمر بدرجة حرارة المطبخ
فانيليا وبشر نصف ليمونة
قطعة خميرة بيرة مهروسة في نصف معلقة سكر
سيرب( شربات يا ختي ) خفيف ( 1سكر +اماء + نص لمونة عند الغليان
(وانا بحط فص مستكة ومسمار قرنفل بيدي طعم شرقي رهيب )
كريم شانتيه للتزيين

الطريقة
اولا نحط اللبن الدافئ عالخميرة وندوب ونسيبها تشتغل وتنشط

هنحط السكر والزبدة

نضرب شوية لحد ما ينعموا ويندمجوا

نضيف البيض والفانيليا وبشر اللمون

نضرب شوية بمضرب سلك لحد ما يندمجوا

نضيف اللبن بالخميرة

نضيف الدقيق على 3 دفعات ونقلب كويس كل مرة

هنوصل لعجينة في قوام الكيك العادي يا بنات مش المعجنات ولو حسيتيها ناشفة زودي ربع كوب لبن دافئ

سبيها متغطية في مكان مقفول زي الفرن مثلا لمدة ساعتين لحد ما تخمر وترتفع لازم والا هتكتم لان ما فيهاش بودر
وفي الوقت دة اعملي الشربات وسبيه يبرد

بعد ما تخمر صبي العجينة بواسطة معلقة في قوالب باباز
(اللي بتبقى مخرومة من النص دي )
او كب كيك وتكون مدهونة زيت خفيف
انا عندي قوالب كب كيك وميني تارت ومعنديش قوالب باباز

دخلي القوالب فرن 180 متسخن من ربع ساعة
وسبيها حوالي تلت ساعة او 25 دقيقة بالكتير
خرجيها هتلاقي لونها دهبي وريحتها تحفة

اول ما تخرج فورا وهيا سخنة اسقيها بالسيرب الخفيف البارد
الافتكاسة بقة اني خرمت الكيكة من النص بقمع قديم او ممكن غطا ازازة
هتسبيها تبرد وبعدين تقطعي الكب من النص بالورب شوية ومش للاخر
شوفوا اسفنجية ازاي من جوة

احشيها كريم شانتية وزينيها براحتك

ولازم لازم تحطيها في التلاجة الاول لان الجاتوه دة بيتقدم بارد والطعم بيفرق في التلاجة بجد